Prentsa Oharren banner

Judimendiko hornidura- eta saneamendu-sarea berritzeko lanak esleitu ditu AMVISAk

5.394.851 euro inbertituko ditu auzo hori eta hiriko beste gune batzuk hobetzeko.

AMVISAko Administrazio Kontseiluak Judimendiko hornidura- eta saneamendu-sarea berritzeko lanak esleitu ditu gaur. Hiriko beste zona batzuk hobetzea ere barne hartzen dute lan horiek. Balgorza-Arana aldi baterako enpresa-elkarteak egingo ditu lan horiek, 5.394.851 euroan; gauzatzeko epea hiru urtekoa izango da.

Judimendin, hornidura-sareko fibrozementu edo burdinurtu griseko hodien ordez, burdinurtu nodular eta polietileno edo mahuka-hodiak jarriko ditu AMVISAk. Saneamendu-sarean, berriz, mahuka-sistema erabiliko da, honen bitartez ez baita zangarik ireki beharrik, kolektoreen narriadura dela eta altxatu beharra dagoenean izan ezik.

Judimendi auzoko hogei bat kaletan egingo dira lan horiek. Herrandarren kalean, esaterako, Done Jakue hiribidetik Olagibel kalera doan kolektorearen edukiera hidraulikoa hobetuko da, baita Urriaren Hamabiaren kalearekiko bidegurutzeko zati batekoa ere.

AMVISAren lehendakari Marian Gutiérrezek azaldu duenez, “ Judimendik —eta beste auzo batzuek, Txagorritxu edo Pilarrek, esaterako— oso ur-sare zaharra dute, eta. konpondu ezean, etorkizunean arazoak sor ditzake. Horregatik egin ditugu obra hauek eta inbertsio handia,  hobetu egingo baita sarearen efizientzia eta bizilagunei eskaintzen diegun zerbitzuaren kalitatea”.

Herritarrei enbarazurik ez sortzeko, zangarik gabeko teknologiak erabiliko dira, ahal den neurrian, obrak egiteko (relining, sliplining, mahuka); hau da, ordeztu nahi den hodiaren barruan beste bat sartzea. Eragozpen gutxiago sortzeaz gain, gauzatze epeak laburragoak dira, eta errentagarriagoak.

Beste auzo batzuk

Hiriko beste gune batzuetan ere egingo dira hornidura-eta saneamendu-sarea hobetzeko lanak: zehazki, Aranbizkarreko, Aranako, Sansomendiko, Mendizorrotzeko eta San Kristobaleko 11 kaletan. Gaur esleitutako kontratuak lan hauek ere barne hartzen ditu.

Share

AMVISAk Europako funtsak eskuratzeko proiektu batean parte hartuko du, teleirakurketa-sistemak instalatzeko

AMVISAren administrazio kontseiluak Europako funtsak eskuratzeko proiektu partekatu batean parte hartzea onetsi du gaur, hornikuntza- eta saneamendu-sareetan teleirakurketa eta telekontroleko sistemak instalatzeko.

AMVISArekin batera, proiektuan parte hartuko dute Bilboko eta Bizkaiko Ur Partzuergoak, Donostiako Udalak, Gipuzkoako Urak eta Itelazpik, horiek ere Next Generation funtsen planean lehiatu nahi dute eta.

Horretarako, uren udal enpresak kanpoko aholkularitza zerbitzuak kontratatzeko hitzarmen bat izenpetzea onetsi du, 4 urterako. Hitzarmen horri esker, proiektua zein dirulaguntza-deialditara aurkeztu definitu ahal izango da, laguntzak eskuratzeko aukera gehiago izate aldera.

Parte hartzen duten aldeen artean finantzatuko dute aholkularitza-gastua –160.000 euro–, eta AMVISAk % 13a ordainduko du.

Share

“Gure Txokoa” onibarra AMVISAri esleitu diote 3,9 milioi euroren truke

Tokiko Gobernu Batzarrak “Gure Txokoa” onibarra besterentzeko kontratua AMVISA uren udal-sozietateak sinatutako eskaintzari esleitzea adostu du. Eragiketaren balio ekonomikoa 3 900 000 eurokoa da. Horixe zen lizitaziora aurkeztutako eskaintza bakarra eta esleitzeko ezarritako irizpideak gainditu ditu prezioari, ordainketa-baldintzei eta eraikinaren erabilera-proposamenarekin lotutako jasangarritasunari eta eragingarritasunari dagokienez. Izan ere, eraikina egokitzeko lanetan gutxienez 200 000 euroko inbertsioa egiteko konpromisoa hartu du bere gain.

Esleitutako onibarraren azalera 1 855,28 metro koadrokoa da eta bi eraikin biltzen ditu: 498,26 metro koadroko lursailean (portxea barne) dagoen eraikin nagusia eta 84 metroko lursailean dagoen eraikin osagarria. Azken horrek 204 metro koadroko eraikitako azalera du guztira. Hirugarren sektoreko erabileraren kalifikazioa dute higiezinek.

Bere garaian iragarri zuten moduan, “Gure Txokoa” saltzearen ondorioz, 21 Zabalgunea eta Gilsa sozietateetako langileek Zulueta jauregira lekuz aldatu beharko dute eta, hala, Senda ibilbidean dagoen eraikin enblematiko hori erabiliko dute. Lekualdaketa osatutakoan, AMVISA sozietatea erositako eraikinean kokatuko da.

Share

Gasteiztar bakoitzak 10, 26 € eman zituen iaz garapenean laguntzeko udal proiektuetarako

Garapenean Laguntzeko Zerbitzuak 2020ko oroitidazkia argitaratu berri du udalaren webgunean, eta bertan jaso denez, gasteiztar bakoitzak 10,26 euroko ekarpena egin zuen iaz udalak arlo honetan sustatutako ekintza eta proiektuetarako. Pasa den ekitaldian, udalak 2.622.970 euro bideratu zituen lankidetzara, AMVISAk egindako ekarpena barne.

2020a urte zaila izan zen maila askotan, baina ez Gasteizen bakarrik, baita udala eta hiriko GGKEk lankidetzan aritzen diren herrialdeetan ere. Garapenean laguntzeko udal politikak lagundu egin du batetik, covid-19k munduan sortutako egoerari aurre egiten, eta, bestetik, herrialde pobretuetan milioika pertsonaren bizi-baldintzak hondatzen dituzten oinarrizko giza eskubideen galeraren funtsezko arrazoiei heltzen.

Memorian – PDFn deskarga daiteke-, udal zerbitzuek, GGKEek eta hiriko beste agente batzuek egindako lanari buruzko informazio eta datu ugari biltzen dira.

Inor atzean ez uzteko eta oinarrizko giza eskubideak bermatzen laguntzen jarraitzeko konpromisoa dugu. Horretarako, udalaren aurrekontuko % 0,67 bideratzen dugu lurralde pobretuetan garapenean laguntzeko proiektuak finantzatzera eta sustatzera. 2020n, covid-19aren ondorioz hemen zein mundu guztian bereziki zaila izan den urtean, Gasteizek solidarioa izaten jarraitu zuen” azpimarratu du Jon Armentia Garapenean Laguntzeko zinegotziak.

2020ko datuak aztertuz, nabarmentzekoa da Garapenean Laguntzeko Zerbitzuak gauzatutako aurrekontua: 2.273.970 euro, hau da, udalaren ohiko diru-sarreren % 0,67a. AMVISAk (Gasteizko Udal Urak, SA) beste 349.000 euroko ekarpena egin du bere aurrekontutik, beraz, Gasteizko udalaren ekarpena 2.622.970 eurokoa izan da guztira arlo honetan.

Lankidetza-proiektuak 13 lurraldetan egin dira: Larrialdietakoak, 11tan. Funtsen % 61,96% Latinoamerikara bideratu da; dirulaguntzen % 31,16 Afrikara, eta Asiara, berriz, guztiaren % 0,25a bakarrik.

Sentsibilizazioa eta garapenerako hezkuntzari dagokionez, Bidezko merkataritzaren eta Kontsumo arduratsuaren aldeko ekintzak eta kanpainak egin dira, baita Aterpea Mediterraneoan jardunaldiak ere. Era berean, askotariko jarduerak egin dira hainbat formatutan, gai desberdinekin eta hiriko publiko desberdinei zuzenduta.

 

Share

1,3 milioi euro baino gehiago Salbatzailearen hilerriko saneamenduaren eta euri-uren sarea berritzeko eta uholde-arazoari irtenbidea emateko  

Gasteizko Udalak 1,3 milioi euro baino gehiago inbertituko du Salbatzailearen hilerriko saneamenduaren eta euri-uren sarea berritzeko, eta, hala, zenbait urtetik hona hilerriak izan dituen uholde-arazoei irtenbidea emateko. Hilerria Kuaternarioko akuiferoaren gainean dago, eta sarea hondatu da urteak pasa ahala; hori dela eta, ur-kolapsoen arazoak egon dira eurite gogorrak egon direnetan.

Lanen aurrekontua 1.367.323,42 eurokoa da, guztira, eta 7 hilabeteko epean gauzatzekoak dira. Zenbateko horretatik, 900.000 euro jarriko ditu Uren udal-enpresa AMVISAk.

Gaur egungo saneamenduaren eta euri-uren sarea duela berrogei urte egin zen, eta oso hondatuta dago, gehienbat sustraien inbasioagatik eta hausturengatik. Kolektoreak andeatzen joan dira, eta, horren eraginez, drainatze-arazoak sortu dira hilobietan eta zolatutako gainazaletan. Udalak, halaber, kameraren bidezko ikuskapena egin zuen kolektoreetan, eta horretan egiaztatu zen horietako batzuk egoera txarrean zaudela.

Orain, Udalak birgaituko ditu ur-kolektoreak, eta egoera okerrenean daudenak berrituko ditu. 250, 300, 400 eta 600 mm-ko diametroa duten kolektoreak berritzeko lanen barruan, gaur egungo zoladura altxatuko da zangak egiteko; kanalizazio eta hodi berriak, putzuak, kutxatilak eta hustubideak jarriko dira; eta, horretaz gain, behar diren garbiketak egingo dira, presio handiko ekipoen bidez.

Lanak gauzatzen diren bitartean, ehorzketek jarraituko dute. Behar den guztietan, ehorzketak egitea eragozten dituzten lanak gelditu beharko ditu enpresa adjudikaziodunak, baita ehorzketetara bertaratzea dagoela bermatu ere.

Share

AMVISAk 6,4 milioi inbertituko ditu Judimendiko hornidura- eta saneamendu-sarea berritzen  

Uren udal-enpresak Pilarren eta unibertsitatearen ingurunean ere hasiko ditu laster hobekuntza-lanak

 

Gaur, AMVISAko administrazio-kontseiluak onetsi du Judimendi auzoan hornidura- eta saneamendu-sarea berritzeko lanak kontratatzeko dosierra hastea.

Proiektua lehiaketan jarriko da 6,4 milioiko aurrekontuarekin eta 36 hilabeteko gauzatze-epearekin. Haietaz gain, dagoeneko, azpiegiturak hobetzeko lanak gauzatzen ari dira San Martinen zenbait hilabetetatik hona, eta laster hastekoak dira Pilarren eta unibertsitatearen ingurunean.

Uren udal-enpresak Judimendin egingo dituen berritze-lanekin batera, Herrandarren kalean doan kolektorearen ahalmen hidraulikoa hobetuko da.

Jarduketa horri esker, zerbitzuaren kalitatea eta efizientzia hobetu ahal izango ditugu, baita matxurak saihestu ere. Gainera, auzoa zaharra da, eta azpiegitura zaharrak ditu; jarduketarekin, auzo berrietan adinako bizi-kalitate eta ongizatea eman nahi diegu bertako bizilagunei. Horregatik egiten ari gara hain inbertsio garrantzitsua, oinarrizko eta funtsezkoa den baliabide hori, ura hain zuzen, bermatzeko eta optimizatzeko”, adierazi du AMVISAko lehendakari Marian Gutiérrezek.

 

Pilarren eta Unibertsitatean

Horretaz gain, AMVISAren administrazio-kontseiluaren bilkuran, lanak adjudikatu dira Pilar auzoko eta unibertsitate-eremuaren inguruneko zenbait kaletako saneamendu-sarea hobetzeko. Uren udal-enpresak, guztira, 2,5 milioi inbertituko ditu proiektu horietan, eta Excavaciones Fermín Oses enpresak gauzatuko ditu lanak.

Unibertsitatearen ingurunean, 1,7 milioi euro baino gehixeagokoa izango da inbertsioa. Han, Unibertsitateko ibilbidean, saneamendua hobetuko da: dagoen kolektorea zuhaitzen sustraietatik babestu, eta sarearen hustuketa-ahalmena hobetuko da San Antonio kaleko lurpeko pasabidearen azpian. Senda ibilbideko kolektorearen ahalmena ere handituko da, eta Ramon y Cajal kaleko zoladura hobetuko da.

Obrak gauzatzeko epea 10 hilabetekoa da.

Pilar auzoan, AMVISAk Juan Garai kalea zeharkatzen duen kolektorearen ahalmena hobetuko du, eta saneamendu-hodiak berrituko ditu auzoko zenbait kaletan. 802.720 euro baino gehixeagoan adjudikatu da obra, eta 6 hilabetean egingo da.

Share

Udalak 319.359 euroko dirulaguntza eman du uraren eta saneamenduaren alorreko lau lankidetza-proiektutarako

Tokiko Gobernu Batzarrak uraren eta saneamenduaren alorreko garapenerako lankidetza-proiektuetarako dirulaguntza-deialdia ebatzi du gaur.

Garapenean Laguntzeko Zerbitzuak eta AMVISAk 319.359 euro jarriko dituzte Latinoamerikako eta Afrikako hainbat herritan uraren hornikuntza eta saneamendua bermatzeko. Elkarte hauen proiektuak onetsi dira: Medicus Mundi Araba, Alboan Fundazioa, Nazioarteko Elkartasuna eta SERSO Euskalherria.

Medicus Mundi Arabak 84.790 euro jasoko ditu Perun proiektu bat garatzeko, zeinen helburua baita Peruko  Purupurucha, Tastacha, Bellavista, Huamanga eta Ayacucho herrietan edateko ura eta biogestoreak dituzten komunak izan ditzatela.

Alboan Fundazioak 86.954 euro jasoko ditu Kolonbiako Restrepo eta Ginebrako landa-komunitateetako hornidura-sistema hobetzeko, edateko ura bermatuz 1.157 pertsonari.

Nazioarteko Elkartasunak 59.608 euro jasoko ditu Gineako Herico Centroko 3.052 pertsonak eta Pelleleko 280k ura izateko aukera bermatzeko, eta Herico Centroko saneamendua hobetzeko.

Azkenik, Serso Euskalherriak 88.005 euro jasoko ditu Honduraseko Jutiapako lau landa-komunitatetan edateko uraren oinarrizko zerbitzuko arazoak konpontzeko, eta ur-iturriak hobeto babesteko.

Elizbarrutiko Caritas

 Halaber Gasteizko Elizbarrutiko Caritasekin lankidetza-hitzarmena egitea onartu da, 54.000 eurokoa, laneratzeko programa bat eta lantegi okupazionalak eta laneratu aurrekoak egiteko.

Share

AMVISAk 900.000 euro emango dizkio Udalari Salbatzailearen hilerriko drainatze-arazoak konpontzeko

Udalaren ur enpresak dibidenduen banaketa onetsi du gaur

AMVISAren Administrazio Kontseiluak dibidenduen banaketa (900.000 euro) onetsi du gaur, eta Udalak jasoko du kopuru hori, Salbatzailearen hilerriak aspalditik dituen drainatze-arazoak konpontzeko.

Sozietateko lehendakari Marian Gutiérrezek aurkeztu du proposamena; gobernu-taldeko ordezkariek zein PPkoek alde bozkatu dute, eta gainerako kontseilukideak abstenitu egin dira.

Orobat, ontzat eman da Udalak AMVISArekin duen merkataritza-zorra (4,2 milioi euro baino zertxobait gehiago) ordaintzeko egutegi berria. Ordaintzeke dauden kuotak datozen zazpi urteetan ordaintzea onetsi du Kontseiluak.

Aurrekontu proiektua

Horretaz gain, AMVISAk 2021rako aurrekontua izapidetzen hastea onetsi du: 24.795.236 milioi euroko proposamena da, 7,8 milioi euroko inbertsioak barne, zeinen artean Txagorritxuko sareak berritzea nabarmentzen baita (2 milioi euro).

Udalaren ur-enpresak proposatzen du 428.000 euro erabiltzea kontagailuak erosi eta ordezteko, eta 938.000 euro sarea mantentzeko eta ur-isuriak detektatzeko, besteak beste.

Share

AMVISAren hodi baten haustura, Arkautin

AMVISAk jakinarazi du hodi bat hautsi dela Arkautiko sarean, Ertzaintzaren Akademiatik gertu, udal enpresarekin zerikusirik ez duten obra batzuen ondorioz.

Makina batek hautsi du hodia, eta urik gabe utzi du horrek akademia eta Zurbano, Argandoña, Ilarratza, Jungitu, Lubiano, Uribarri Arratzua, Matauku eta Zerio herriak, baita Estibalizko urbanizazioa ere.

Ordu biak eta erdirako edo hornikuntza bere onera itzularaztea espero da.

Share

AMVISAk informazioa eta aholku ematen ari da nekazaritza-eremuko abonatuei, ura arduraz kontsumitu dezaten

Informazio-gutunak bidali dizkiete eguneko 400 litrotik gora kontsumitzen dituzten etxebizitzei.

 

AMVISAk informazio-gutunak bidali dizkiete nekazaritza-eremuko abonatuei, zeinetan aholku praktikoak eskaintzen baitizkiete ur-instalazioan balizko arazoak hauteman eta konpontzeko, hartara murrizteko –ahal den neurrian behintzat– neurriz gaineko kontsumoa.

Udalaren ur-enpresa informazio-kanpaina zuzentzen ari da eguneko 400 litrotik gora kontsumitzen dituzten etxebizitzetara; aintzat hartu behar da kontsumo hori nabarmen areagotzen ohi dela udan. Eguraldi ona, baratze eta berdeguneen ureztapena, etxeko igerilekuen instalazioa eta jarduera ludiko eta aisialdikoetan ur-tutua neurriz gaineko erabilera tarteko, ikaragarri hazten da ur-kontsumoa, eta horrek mehatxatu egiten du uraren kontsumo arduratsua.

Ura xahutzeko arrisku horrek bi etxebizitza-motari eragiten die batez ere: nekazaritza-eremuan daudenei eta familia bakarrekoei, zein, sarri askotan, herrietan baitaude.

“Iaz antzeko informazio-kanpaina bat egin genuen, baina orduan hiriko familia bakarreko etxeei zuzendua; aurten, berriz, nekazaritza-eremuko herrietarantz jo dugu. Ingurumen-arrazoiak alde batera, bestelako argudiorik era badugu kontsumoa arrazoizkoa eta neurrizkoa izan dadin, hartara herri horietan zerbitzuaren kalitatea kolokan jarri ko ez delarik”, dio AMVISAko lehendakari Marian Gutiérrezek.

2019Ko datuen arabera, AMVISAk hornitutako nekazaritza-guneko herrietako batez besteko eguneko kontsumoa 357 litrokoa izan zen, hirigunekoaren bikoitza eta gehiago. Alabaina, soilik udako datuak kontuan hartuz gero, hazkuntza % 150ekoa da.

 

 

Share