Prentsa Oharren banner

Gasteizko Emakumeen Etxeak irudia eta web-orria estreinatu ditu, eta presentzia handiagoa izango du sare sozialetan

Jabetze Feministarako Eskolak datorren astean abiaraziko du ikasturtea, arrazakeriari eta emakume beltzen sexualitateari eta identitateari buruzko komedia dramatiko batekin; Hegoalde gizarte-etxean eskainiko da lana.

 

Gasteizko Emakumeen Etxeak irudia eta web-orria berritzeko baliatu du ikasturte hasiera, eta sare sozialetan ere presentzia handiagoa izango du. Hala iragarri dute Berdintasun Zerbitzuko zinegotzi Miren Fernández de Landak eta zerbitzuko buru Mireia Espiauk Jabetze Feministarako Eskolaren ikasturte berriaren aurkezpenean. Izan ere, datorren asteazkenean, irailak 29, abiaraziko da Emakumeen Etxearen prestakuntza-proiektuaren, hots, eskolaren programazio berria, Silvia Albert aktorearen “No es país para negras” ikuskizunarekin. Hegoalde gizarte-etxeko Jesús Ibáñez de Matauco antzokiak hartuko du inaugurazio-ekitaldia, eta oraindik bada lekurik, edukiera handitu baita covid-aren aurkako neurri berriak direla eta.

Miren Fernández de Landa zinegotziak bereziki azpimarratu nahi izan du Eskolaren proiektua (hamarkada batetik gorako ibilbidea duena) eta Emakumeen Etxea (duela bi urte ireki zena) batzen dituen lotura. “Eskola Emakumeen Etxean txertatzen da, haren prestakuntza-proiektu gisa. Gainera, ahalduntze kolektiborako prozesuak sustatzen dituzten ekimenak hartzen ditu Etxeak, emakumeak beren intereseko gaien inguruan antolatu daitezen eta beren boterea handitu dezaten, alegia, baliabide material eta sinbolikoen erabilera eta kontrola bereganatu dezaten. Azken batean, emakumeek zuzenean haiengan eragina duten erabakietan esku har dezaten da Etxearen helburua, berdintasun-politiketan eta gizarte-aldaketan parte hartuz”. Horrekin lotuta, zinegotziak eskerrak eman dizkie “Gasteizerako Etxea sortzeko prozesu luzean lagundu diguten emakume guztiei eta, bereziki, Sorginenea-Tu Casa Feminista elkarteari, zeinak abiarazi eta lehenengo hamahiru hilabeteetan kudeatu baitzuen”.

Ikasturte berriarekin batera, Emakumeen Etxeak logoa estreinatuko du; horrek proiektua emakumeak “ahalduntzerako espazio gisa” identifikatuko du, “non edukiontzia ez ezik edukia ere garrantzitsua baita. Etxearen siluetaren  bitartez, espazioari berari egiten zaio erreferentzia: topaketarako espazio irekia. Ortzadarraren sinboloak edukiaren garrantzia sinbolizatzen du, kolektibitatea, aniztasuna eta mugimendua. Sinbolo feministaren bitartez, azkenik, proiektuaren indarra, oinarria eta helburu bera identifikatzen ditugu”, azaldu du Berdintasuneko zinegotziak.

Irudia berritzeaz gain, Emakumeen Etxeak www.vitoria-gasteiz.org/emakumeenetxea web orria eguneratu du, Udalaren webgunearen barruan. Proiektuari buruzko informazioa, jardueren agenda, eskaintzen dituen zerbitzuak, talde egonkorrak eta Jabetze Feministarako Eskolaren prestakuntza-jarduerak jasotzen ditu web-orriak.

Bestetik, Emakumeen Etxeak presentzia izango du Instagram sarean (@EmakumeenEtxeaVG), sare sozialak tresna estrategikoa izan baitaitezke zabalkunde lanetan; orobat, feminismoaren inguruko eztabaidak eta gogoetak sustatu nahi dira horren bidez, ahalduntzeko  beste tresna bat izan daitekeen aldetik.

Gazteei irekitako Etxea

 Profil berria irekitzeko beste arrazoi bat Etxearen proposamenak gazteengana hurbiltzea da. Horixe da proiektuak etapa berrian lortu nahi duen erronka nagusietako bat, Jabekuntzarako Eskolak ume eta gazteei begira sortutako #FeminismoanItzel programazioarekin abiarazitako ildoa sendotzeko.

 

Web-orri berritua

 

Jabetze Feministarako Eskola, 2021-2022 ikasturtea 

 

 

 

Share

Gaur irekiko da Jabetze Feministarako eta haur eta gazteentzako Eskoletako ikasturte berriko jardueretan izena emateko epea

 77 proposamen eskainiko dira datorren ikasturteko programazioan, eta, berrikuntza gisa, streaming bidez jarraitu ahalko dira hainbat jarduera

 

Udalak feminismoari buruzko ikerketa-lanen lehiaketa deitu du bigarren aldiz.

 

Informazio liburuzka (pdf) 

Gaur irekiko da Jabetze Feministarako Eskolako ikasturte berriko jardueretan izena emateko epea. 77 proposamen eskainiko dira datorren ikasturteko programazioan, eta, berrikuntza gisa, streaming bidez jarraitu ahalko dira hainbat jarduera

“Jabetze Feministarako Eskolak, orain arteko hamaika edizioetan, feminismoa hedatu du gure udalerrian, ordutik hona antolatutako ehunka prestakuntza- eta kultura-proposamenen bidez. Horien bitartez,  urtero-urtero, milaka emakume jabetu dira genero arrazoiengatik bizi duten zapalketa-egoeraz, baina baita beren gaitasun eta interesez ere.  Horretaz gain, bertatik bertara ezagutu dituzte bestelako zapalkuntza-motek –hala nola sexu-orientazioak eta genero-identitateak, kultura-testuinguruak, dibertsitate funtzionalak, adinak edo gizarte-mailak – eragindako pertsonen errealitateak. Halaber, emakume askok erreferenteak eta lankide inspiratzaileak aurkitu dituzte eskolan, eguneroko liberazio txikien edo erresistentzia latzen protagonistak, esaterako aurtengo  Herri Handi zikloan ezagutuko ditugunak” adierazi du Berdintasuneko  zinegotzi Miren Fernández de Landak.

Eskolak Emakumeen Etxean du egoitza, Etxanobe jauregian. Bertan, gainera, jabetze kolektiborako prozesuak sustatzeko ekimenak egiten dira, emakumeak beren intereseko gaien inguruan antola daitezen eta beren boterea areagotu dezaten, hau da, emakumeek baliabide material eta sinbolikoak erabili eta kontrolatzeko. Horren adibide dira Eleen ganbara, Sorgineneako liburutegia eta eskolan denbora igaro ahala egonkor bihurtu diren taldeak.  “Azken finean,  Emakumeen Etxeak helburu du emakumeek beraiei zuzenean eragiten dieten erabakietan zeresana izatea, berdintasun-politiketan eta gizartearen eraldaketan parte hartzea dela medio. Eskerrak eman nahi dizkiegu Gasteizko Etxe hau sortzeko prozesu luzean lagundu ziguten guztiei eta, bereziki, Sorginenea-Tu casa feminista elkarteari, Emakumeen Etxean abian jarri eta lehen hamahiru urteetan kudeatzeagatik” nabarmendu du zinegotziak.

Aurten, 11. ikasturtea egingo du Eskolak, eta programazio anitza eta berritzailea prestatu du.

  • Herri Handi. Herri handiaren hitzaldiak infernu txiki baterako

Zikloaren bigarren edizioa erresistentzian ari diren herriei eskainita dago. Nikaraguako, Saharako, Palestinako, Erdialdeko Amerikako eta Ekuadorreko aktibista feministek hainbat arlotan dituzten borrokak azalduko dituzte, testuinguruen arabera: ekonomiaren eta ingurumenaren arloko justizia; gorputz-lurraldearen eskubidea; abortuaren zigorgabetze soziala eta legala; egia-, justizia- eta erreparazio prozesuak eta berriz ez errepikatzeko bermea; sistema sionistaren aurreko erresistentzia, palestinarren kasuan; edo Edo Estatu baten eraikuntza, sahararren kasuan.

  • Feminismoari buruzko ikerketa-lanen lehiaketa, Emakumeen eta Gizonen Berdintasunerako Masterrekin lankidetzan: EHUko Berdintasun Eragileak.

Udalak bigarren aldiz jarri du martxan lehiaketa hau,  eskolan ezagutza eta ikerketa feminista sustatzeko eta, horrela, udalerrian ahalduntze feminista lortzen laguntzeko. Aurkezlearentzat interesgarri diren gaien ingurukoak izango dira ikerketa-proiektuak, eta ahalduntze feministaren esperientziak aztertu beharko dira, edota emakumeen eta LGTBI pertsonen eskubideen aldeko eraldaketa sozialari ekarpenak nola egin.

Lehiaketaren oinarriak helbide hauetan eskura daitezke:

  • vitoria-gasteiz.org/eskolafeminista (euskaraz)
  • vitoria-gasteiz.org/escuelafeminista ( gaztelaniaz)

Aurten hiru ikerketa-proposamen aukeratuko dira (iaz bakarra izan zen). Hautatutako hiru proiektuek 4.800na € jasoko dute (iaz 4.500 euro) Ikasturtean zehar ikerketa-lanak garatu ondoren, hitzaldi batek emango dio hasiera lanak aurkezteko ekitaldiari:  “La transversalidad del principio de Igualdad en la investigación”. Asun Ventura Franch-ek emango du (Zuzenbideko doktorea, Valentziako Unibertsitatean).

Baietz ulertu

Proposamenen % 33,77 euskaraz dira, hau da, % 9,1 igo da aurreko edizioaren aldean. Halaber, Baietz Ulertu zigilua sortu da, eta euskaraz diren hainbat jardueren ondoan ageri da liburuxkan. Zigiluak adierazten du jarduera horretan ez dela jendaurrean euskaraz hitz egin beharko, baina bai ulertu.

Berrikuntza hauek ere izango dira aurten:

  • Aurrez aurreko hitzaldiak streaming bidez ere jarraitu ahalko dira, horretarako egokitutako webgunearen bidez: vitoria-gasteiz.org/EEF-endirecto (gaztelaniaz) eta www.vitoria-gasteiz.org/JFE-zuzenean (euskaraz).
  • COVID-19aren transmisioa prebenitzeko, pandemia aurretik irekiak ziren jardueretan parte hartzeko –antzerkiak, kontzertuak, hitzaldiak, dokumentalak, zineforumak, inaugurazio- eta amaiera- ekitaldiak) gonbit-txartelak beharko dira. Ikastaro, lantegi eta irakurketa klubetarako ere izena eman beharko da.

Irekiak diren jardueretarako gonbit-txartelak ekitaldi bakoitzaren data baino 20 egun lehenagotik erreserbatu ahalko dira, webgune hauetan:

  • vitoria-gasteiz.org/eskolafeminista (euskaraz)
  • vitoria-gasteiz.org/escuelafeminista (gaztelaniaz)

 

Share

Jabetze Feministarako Eskolak María Ruiz kantautorearen kontzertu batekin eman dio amaiera bere ikasturteari

María Ruiz kantautore feministaren kontzertu batek amaiera eman dio Jabetze Feministarako Eskolaren 2020-2021 ikasturteari, Aldabeko gizarte-etxeko ekitaldi-aretoan. Mariak, Eva Sierrarekin eta La Mare-rekin batera, Arte Muhé kolektiboa osatzen dute, eta arte eszenikoak erabiltzen dituzte lesbiana feministen beren aktibismorako.

Ekitaldiarako, aretoa bete da, eta bertan parte hartu dute Gorka Urtaran alkateak eta Miren Fernández de Landa Berdintasuneko zinegotziak. Alkateak azpimarratu du Berdintasun Zerbitzuak hamar aste hauetan izan duen konpromisoa, eta nabarmendu duenez, “horretan ez du bakarrik egin bidea. Kolektibo feministek eta LGTBI-kolektiboek, emakumeen elkarteek eta elkarte mistoek eta tokiko gobernu-taldeek izan ditu ondoan, eta Eskolaren proiektuaren iraunkortasuna ziurtatu, eta haren ikuspegi feminista bermatu dute. Ikasturtez ikasturte eskolan parte hartu dutenek —milaka pertsona, emakumeak gehienak— zentzua eman diote. Zuek guztiok egin duzue posible gaur egun Gasteizen dugun Jabetze Feministarako Eskola”.


Jabetze Feministarako Eskolaren oraingo edizioan, lehenengoz jarri da abian Ikerlan Feministen Lehiaketa. Hauek izan dira lehen lehiaketa horretako irabazleak: batetik, Andrea Perales Fernández de Gamboa eta María Gema Lasarte Leonet, “Literatur klub feministen lanaren bisibilizazio premia” proposamenarekin, eta, bestetik, Irati García López de Aguileta “Nire gorputza gudu-zelai bat da. Feminismoen rola gasteiztar emakume lodien bizipenetan” proposamenarekin.

Hamargarren urteurrena

2011ko azaroan, emakumeentzako lehenengo ikastaro eta lantegiak (Gizartean eragina izan zezaten) antolatu zituen Gasteizko Udalaren Berdintasun Zerbitzuak. Horrekin hasiera eman zitzaion proiektuari, zeinak herritarrei interesatuz gero Euskal Herriko beste udalerri batzuetan zeudenen antzerako jabetze-eskola bihurtu nahi baitzuen.

Harrezkeroztik, jarduera ugari egin ditu: ikastaroak eta lantegiak, hitzaldiak, zineforumak, antzezlanak, kontzertuak, irakurketa-klubak eta #FeminismoMola (haur eta gazteentzako ekimen multzoa), besteak beste. Horiek guztiek Jabetze Feministarako Eskola taxutu dute, eta edukiz bete dute.

 

 

Share

Andrea Perales Fernández de Gamboak, María Gema Lasarte Leonetek eta Irati García López de Aguiletak irabazi dute Gasteizko ikerketa feministarako lehiaketa

 

Saritutako bi proposamenek irakurle-klub feministak eta feminismoak lodifobiaren aurkako borrokan duen zeregina dituzte aztergai

 

Zaila izan da erabakitzea, kalitate tekniko handiko 31 proposamen aurkeztu baitira

 

Gasteizko Udaleko Berdintasun Zerbitzuak ikerketa feministarako lehen lehiaketa jarri du martxan aurten, EHUko Gizon eta Emakumeen Berdintasuna: Berdintasun Agenteak masterrarekiko elkarlanean, eta deialdiak oso harrera ona izan du.

Gaur jakinarazi dute lehiaketaren epaia, eta Andrea Perales Fernández de Gamboa, María Gema Lasarte Leonet eta Irati García López de Aguileta gertatu dira irabazle.  Saritutako bi proposamenek irakurle-klub feministak eta feminismoak lodifobiaren aurkako borrokan duen zeregina dituzte aztergai. Sari bakoitza 4.500 eurokoa da.

Feminismoari buruzko ikerketa-lanen 2020-2021eko lehiaketara 31 proposamen aurkeztu dira guztira, askotariko gaien inguruan. Besteak beste, migratzaileak, zaintzak, sexu-orientazioa eta genero-identitatea, dibertsitate funtzionala, osasuna, kultura, artea, feminismoa, gorputzaren bidezko ahalduntzea, prostituzioa, hedabideak, hezkuntza eta zientzia ukitzen dituzte, betiere ikuspegi feminista batetik.

Jasotako proposamenen kopurua ez ezik horien kalitate teknikoa ere nabarmentzekoa da. Hori dela eta, zaila gertatu da erabakitzea; azkenean bi proposamenek lortu dute puntuaziorik handiena eta, beraz, bi horiek sarituko dira: “Literatur klub feministen lanaren bisibilizazio premia”, Andrea Perales Fernández de Gamboa eta María Gema Lasarte Leonetena, eta “Nire gorputza gudu-zelai bat da. Feminismoen rola gasteiztar emakume lodien bizipenetan”, Irati García López de Aguiletarena.

“Literatur klub feministen lanaren bisibilizazio premia” lanaren helburua da Euskadiko hainbat ahalduntze eskolatan antolatutako irakurketa klubetan egiten den lana ezagutaraztea, zientzian eta dibulgazioan oinarrituz. Horretarako, ikerketak Feminist Agenda kluba hartuko du paradigmatzat, zeina Gasteizko Jabetze Feministarako Eskolak eskaintzen baitu.

Bestetik, “Nire gorputza gudu-zelai bat da. Feminismoen rola gasteiztar emakume lodien bizipenetan” proposamenaren helburua da ikuspegi intersekzional batetik aztertzea Gasteizen aktibismo feministak izan dezakeen ahalmena emakume lodien gorputz bizipena eta testuinguru feministetan aurkitzen dituzten erresistentziak hobetzerakoan.

Ezagutza eta ikerketa feminista bultzatzea

Gasteizko Jabetze Feministarako Eskolaren 2020-2021eko programan sartu da lehen aldiz feminismoari buruzko ikerketa-lanen lehiaketa, Eskolaren testuinguruan ezagutza eta ikerketa feminista sustatzeko eta, horrela, udalerrian ahalduntze feminista lortzen laguntzeko.

Lehiaketaren oinarrien arabera, aurkezten zituenarentzat interesgarri ziren gaien ingurukoak izan behar zuten ikerketa-proiektuek, eta ahalduntze feministaren esperientziak aztertu, edota emakumeen eta LGTBI pertsonen eskubideen aldeko eraldaketa sozialari ekarpenak nola egin.

 

 

Share

Jabetze Feministarako Eskolaren ikasturtearen  inaugurazioa, bere  hamargarren urteurrenean

Gorka Urtaran alkateak eta Miren Fernandez de Landa Berdintasun zinegotziak eman diote hasiera lehen lauhilekoan 77 jarduera online eskainiko dituen eskolaren 10. edizioari

Gorka Urtaran alkateak eta Miren Fernandez de Landa Berdintasun zinegotziak hasiera eman diote gaur arratsaldean Jabekuntza feministarako Eskolaren 10. edizioari. Horretarako, Beñat Etxepare antzokiak A Panadería konpainiaren “Elisa y Marcela” antzezlana hartu du.

Estatuan urratsak eman zituen lehen eskola feministetako bat da Jabetze Feministarako Eskola, eta hamar urte beteko ditu aurten, programazio sendoarekin, “desberdintasunetan arreta jartzen jarraitzeko akuilu, bereziki azken garaiotan, baita zenbait foro publikotan ere, erdi ezkutuan zenbaitetan, bortizki beste batzuetan, emakumeen eta LGTBI pertsonen eskubideen inguruan zalantzak erakutsi dituenik agertu den honetan. Hamar urte hauetan, Berdintasun Zerbitzuak ez du bakarrik egin bidea. Aldean izan ditu kolektibo feministek eta LGTBI-kolektiboak, emakume-elkarteak eta elkarte mistoek, eta hainbat gobernu-talde, zeinek proiektu horren iraunkortasuna bermatu baitute, ikuspegi feministatik”, azaldu du Miren Fernández de Landa.

Gorka Urtaranek eskerrak eman dizkie “gure gizartea eraldatzen urteak daramatzazuen emakume guztiei. Gasteiz berdintasunezkoago eta inklusiboago baterantz bultzatuz, non aukera-berdintasuna errealitate bihurtzen hasiko den gero eta eremu gehiagotan. Gaur, Eskolaren hamargarren urteurrenean, denok berresten dugu berdintasunarekiko konpromisoa, emakumeen mugimendu feministaren eta elkarte-mugimenduaren borroka eta aldarrikapenei esker lortutako oinarrizko eskubideen atzerapausoen eta mehatxuen aurrean. Maila indibidualean hainbeste pertsonarena eta eskaera horiek beren agendan berdintasuna jarriz txertatu ditugun erakundeena ere”.

Share

Hamargarren urteurrena ospatuko du Jabetze Feministarako Eskolak, berdintasunerako kolektibo, erakunde eta elkarteen eginkizun eraldatzailea nabarmenduz

 

Gaur irekiko da epea, 77 jarduera —online, lehen lauhilekoan— eskainiko dituen eskolaren 10. edizioan izena emateko

 

Estatuan urratsak eman zituen lehen eskola feministetako bat da Jabetze Feministarako Eskola, eta hamar urte beteko ditu aurten, programazio sendoarekin, “desberdintasunetan arreta jartzen jarraitzeko akuilu, bereziki azken garaiotan, baita zenbait foro publikotan ere, erdi ezkutuan zenbaitetan, bortizki beste batzuetan, emakumeen eta LGTBI pertsonen eskubideen inguruan zalantzak erakutsi dituenik agertu den honetan. Hamar urte hauetan, Berdintasun Zerbitzuak ez du bakarrik egin bidea. Aldean izan ditu kolektibo feministek eta LGTBI-kolektiboak, emakume-elkarteak eta elkarte mistoek, eta hainbat gobernu-talde, zeinek proiektu horren iraunkortasuna bermatu baitute, ikuspegi feministatik”, azaldu dute Miren Fernández de Landa Berdintasun zinegotziak eta Mireia Espiau zerbitzuburuak, ikasturte berriko programazioaren aurkezpenean.

Hamar urte horietan, eskolak bilakaera handia izan du, 2011ko azaroan emakumeei zuzendutako ikastaro eta lantegietatik hasi —gizartean eragina izan zezaten— eta jardueren agenda oso bat edukitzeraino, zein ikuspegia zabaltzen joan baita errealitate gehiagotara. Duela bi urte #FeminismoMola eskola txikia ireki zen, eta hirian Emakumeen Etxea sortzen lagundu, aurrerapen nagusi gisa, besteak beste.

Gaur ireki du Gasteizko Jabetze Feministarako Eskolak izena emateko epea, irailetik maiatzera arteko programazioko 77 jardueretarako. Bi nobedade izango dira ikasturte honetan: feminismo dekolonialari buruzko Herri Handi hitzaldi-zikloa —mundu osoko ekintzaileek emango dituzte hitzaldiak—, eta feminismoari buruzko ikerketa-lanen lehiaketa, Euskal Herriko Unibertsitateko Gizon eta Emakumeen Berdintasunaren Masterrarekin —berdintasun-agenteak— elkarlanean.

Planetako beste latitude batzuetan sortutako diskurtso eta praktikak ekarriko ditu Gasteizera hitzaldi-zikloak.  ‘Herri txiki, infernu handi’ esaeran oinarrituta dago izenburua. Hori egia izan litekeelakoan, batez ere emakumeentzat eta sexu- eta genero-disidentzientzat, askatasunak aldarrikatzeko orduan ‘herri handiaren’ elkartasuna martxan jartzeko gonbita egingo dute hainbat hizlarik.

Bestalde, “gure eskolan ezagutza eta ikerketa feminista sustatzeko eta, horrela, udalerrian ahalduntze feminista lortzen laguntzeko helburuarekin jarri da abian ikerketa-lehiaketa. Aurkezten dituenarentzat interesgarri diren gaien ingurukoak izango dira ikerketa-proiektuak, eta ahalduntze feministaren esperientziak aztertu beharko dira, edota emakumeen eta LGTBI pertsonen eskubideen aldeko eraldaketa sozialari ekarpenak nola egin”, azaldu du zinegotziak. Eskolaren webgunean daude eskuragarri lehiaketaren oinarriak:  www.vitoria-gasteiz.org/eskolafeminista

Lehen lauhilekoan, jarduerak online izango dira, Covid-19aren komunitate-transmisioari aurre egitea helburu.

Jabetze Feministarako Eskolaren programa, 2020-2021 (pdf)

Share