Prentsa Oharren banner

Udal Musika Bandak gure zibilizazioen Historian barrena bidaia egitera gonbidatuko gaitu datorren denboraldian

Irailaren 8an hasiko da abonamenduen salmenta

 

‘Haec Est Victoria Quae Vincit’ (irabazten duen Garaipena’) izenburupean, abonamendu-denboraldi berria aurkeztuko du Gasteizko Udal Musika Bandak; bertan 7 emanaldi eskainiko ditu Bandak irailetik maiatzera, Principal antzokian, arratsaldeko 19:30ean.

Hezkuntza eta Kultura zinegotzi Estíbaliz Canto eta Udal Bandaren zuzendari Luis Orduña izan dira zikloa aurkezteko prentsaurrekoan. “2021-22 denboraldian gure zibilizazioetako Historiaren zati bat ezagutuko dugu, eta iraganaz, orainaz eta etorkizunaz jardungo dugu. Iraganeko kultura jakin batzuetara joko dugu –baskoiak, zeltak, erromatarrak…– eta gure gizarteraino iritsiko gara”, esan du Cantok.

Orduñak azpimarratu duenez, “denboraldiko kontzertu bakoitzak esapide ezagun bat izango du izenburu, eta bakoitzak unibertso desberdin batera eramango gaitu, bakoitzean historio desberdin bat kontatuko baitugu”.

Hartara, zikloa irailaren 29an hasiko da, asteazkenez, ‘Alea iacta est’ (‘Zotzak boteak dira’) izenpean, eta bertan María Hinojosa sopranoa eta Moisés Évora narratzailea arituko dira. Azaroaren 24an emakume bat gonbidatuko Bandak, zuzendari lanetarako, Margarita Lorenzo, zeinek ‘Veni, vidi, vici’ (‘Etorri, ikusi eta garaitu, dena bat’) izeneko kontzertua gidatuko baitu. Eta abenduaren 22an Steven Lin izango da Principalen, pianoaren aurrean; Udal Bandarekin batera ‘In perpetuum’ (`Betirako’) programaren baitako piezak joko ditu.

2022ko urtarrilaren 26an ‘Desideratum’ (‘Desiratzen dena’) izeneko programa eskainiko du Bandak, Pablo Urbina zuzendari gonbidatu hartuta, eta otsailaren 9an ‘Ad infinitum’ (‘Mugarik gabe’) izenekoa, Ibon Ariznabarreta flauta-jotzaile bakarlariaren laguntzarekin.

Martxoaren 16an abonamendutik kanpoko kontzertua izango da, ‘Errare Humanun est’ (‘Gizakion ezaugarria da huts egitea’) izenpean; Bandaren alboan Kloy raperoa, DJ Parrucho, Sofía Martínez konpositorea eta Gasteizko Arte eta Lanbide Eskola arituko dira. Kohntzertu horretarako sarrerak eguna iritsi ahala erosi ahalko dira.

Eta Gasteizko Udal Musika Bandaren 2021-2022 abonamendu-denboraldia maiatzaren 11n amaituko da, ‘Carpe diem’ (‘Goza ezazu momentua’) kontzertuarekin, Javier Bonet tronpa-jotzaile bakarlari arituko delarik.

Irailaren 8ko 17.30ean (asteazkena) jarriko dira salgai 6 kontzertutarako abonamenduak, 24 euroan, eta sarrera solteak, berriz, irailaren 22tik aurrera erosi ahal izango dira, 5 euroan. Principal antzokiaren ohiko salmenta-bideak baliatuz erosi ahal izango dira.

Egun horretan berean jarriko dira salgai 2020ko Urrezko Zeledonen Galarako (zein irailaren 22an egingo baita) sarrerak. Sarrera horiek 3 euro balioko dute.

Informazio gehiago: www.vitoria-gasteiz.org/banda

Share

Ia 6.500 pertsonak gozatu dute Principal antzokiko udako programazioaz

“Asesinos todos” lanak, Carlos Soberarekin, hiru saioak bete zituen

 

Principal antzokiko udako programazioak 6.455 pertsonaren asistentzia izan du, hau da, % 78,1eko batez besteko okupazioa izan da uztailaren 14tik abuztuaren 8ra bitartean eskaini diren 11 ikuskizunetan. Komedia eta musika izan dira nagusi aste horietan.

“Asesinos todos” komediak —Carlos Sobera zen protagonista, Elisa Matilla, Neus Asensi eta Angel Pardorekin batera— hiru saioak (400 leku saioko) bete zituen, eta denboraldiko arrakastatsuena gertatu da.

Programazioari amaiera eman zion lanak ere —Loles León aktore ezagunaren “Una noche con ella”— ikusle ugari bildu zituen. Orotara 1.046 pertsona erakarri zituen lan horrek ehun urtetik gora duen antzokira, eta % 87,5eko okupazioa lortu zuen.

Jorge Javier Vázquezen “Desmontando a Séneca” lanak hartu du egun gehien, 5 saio egin baititu. Orotara 1.473 pertsona hurbildu ziren telebista-aurkezle ospetsua ikustera, % 74ko asistentziarekin.

María Castroren “La Coartada” antzezlanak, berriz, edukieraren % 64 bete zuen. Guztira, 766 pertsonak ikusi zituzten hiru funtzioak.

 

Beste proposamen batzuk  

Gasteizko Jazzaldiaren barruan bost kontzertu eskaini ziren uztailaren 14tik 18ra bitartean; 1.383 entzule izan ziren, hau da, % 78ko okupazioa.

Uztailaren 23an, Mikel Urdangarinek eta haren taldeak Izurdeen Lekua izeneko kontzertua eskaini zuten; 223 sarrera saldu ziren, eta okupazioa % 56 izan zen.

Euskal Herriko Gazte Orkestrak, azkenik, uztailaren 26an jo zuen; 326 pertsona bildu ziren kontzertuan, % 70eko okupazioarekin.

Share

(Gaurkotua) Udalak Principal Antzokia eraberritzeko azterketa teknikoa zabaldu du eraikuntza-proiektua lehiaketara atera aurretik

Gasteizko Udaleko Plangintza eta Proiektu Zerbitzuak Principal Antzokia eraberritu aurreko azterketa teknikoa zabaltzeko eskatu du, eraikuntza-proiektua esleitzeko plegua lehiaketara atera aurretik.

“Hiriarentzat proiekturik onena izan nahi dugu eta horretarako garrantzitsua da aukera guztiak ezagutzea, gure antzerki maitatuenaren hurrengo hamarkadak zehaztuko dituen erabakia hartu aurretik. Alboko espazioen (Opera-eraikina) aukerak ezagutu behar dira, baita egungo eraikuntza-egoeran eta etorkizunean aurreikusitako eguzki-aukerak ere, eraikuntza-proiektua lizitaziora atera aurretik. Horregatik, eraikina araudietara egokitzeko eta antzokia hobetzeko jarduerak aztertu dituen enpresari eskatu diogu bere azterketa zabaltzeko”, azaldu du Cesar Fernandez de Landa zinegotziak.

IDOM enpresa azterketa hori egiten ari da orain, eta espero da laster izango direla emaitzak, Udalak behin betiko alternatiba bat aukeratu baino lehen.

“Aukera guztiak aztertzen ari gara Principal antzokia XXI. mendeko antzokia izan dadin, egoki diren irisgarritasun- eta segurtasun-baldintzak beteko dituena eta denboraldi bakoitzean bertara datozen konpainien beharrei erantzuterik izango duena”, azaldu du Hezkuntza eta Kultura zinegotzi Estíbaliz Cantok.

Share

Udalaren Folklore Akademiak ikasturte amaierako entzunaldia eskainiko du ekainaren 9an, Principal antzokian

Streaming bidez jarraitu ahalko da lehen aldiz

 Pandemiak eragindako urtearen ostean, Gasteizko Udalaren Folklore Akademiak ekainaren 9an, asteazkena, emango du ikasturte amaierako entzunaldia, 19:30ean, Principal antzokian. Ikastetxeko ikasleen gurasoentzako jaia da. Covid-19aren aurka hartutako protokolo zorrotzari esker, zentroak nahiko normal egin ahal izan du ikasturtea.

Honako piezak entzungo dira: ‘Arabako bideak’ (gaita eta perkusio taldearen eskutik); ‘Heriotza bezain hotza’  txalaparta, alboka eta txirula taldearen eskutik); ‘Vida de rico’ (trikitixa taldearen eskutik) eta ‘Ansoa anaiak’ (nagusien txistu taldearen eskutik).

Dantza-taldeek pieza hauek dantzatuko dituzte:  ‘Brunilda’, ‘Eskutik heldu eta egin dantza’, ‘Dantza nazazu’, ‘Firin-faran Azokan’ eta ‘Garena garelako’.

Saioa streaming bidez jarraitu ahalko da. Esteka

Izena emateko kanpaina

Folklore Akademian izena emateko kanpaina amaitu delarik, datuek agerian uzten dute susperraldi argia osasun-krisiaren ondoren. 2021-2020 ikasturtean 226 ikasle matrikulatu ziren, eta 2021-2022 ikasturterako 356 lagunek eman dute izena, pandemiaren aurreko ikasturteko (2018-2019) 362tik hurbil.

Ikastetxean euskal musika eta dantza tradizionala irakasten zaie Gasteiztarrei, eta hainbat irakasgai ematen dira: alboka, gaita, txalaparta, txistua, txirula, trikitixa eta panderoa. Gainera, ikastegian beste ikasgai hauek ematen dira: musika-hastapenak, musikaren lengoaia, euskal dantzak, abesbatza eta perkusioa.

 

 

Share

‘Globaliz-acción!’ kontzertua egingo da Principal antzokian apirilaren 21ean 19:00etan

Udal Bandaren abonamenduko seigarren kontzertuan Rayuela Ensemble laukoteak hartuko du parte

 

Gasteizko Principal Antzokian izango da Udal Musika Bandaren abonamenduko seigarren kontzertua, apirilaren 21ean (asteazkena), arratsaldeko zazpietan; “Globaliz-acción” du izenburu. Rayuela Ensemble saxofoi-laukotea izango da bakarlari gonbidatua eta Luis Orduña zuzendariaren esanetara arituko da.

Gasteizko taldeak Oscar Mussoren “Covidzation” abestia joko du (erabateko estreinaldia izango da), Raquel Sánchezen “Alhambra, el último reino”, eta Julie Girouxen “Khan”. Errepertorioan kanta gehiago egongo dira: Otto M. Schwarzen “Around the World in 80 Days”, Thomas Dossen “Spotlights” eta Philippe Geissen “Sir Patrick”.

Abesti guztiak lehen aldiz joko ditu bandak, “Sir Patrick” izan ezik.

Kontzertua aurkezteko prentsaurrekoan Luis Orduñak eta Rayuela saxofoi-laukotearen bozeramale Nahikari Olorizek hartu dute parte. Azken honek ilusioa erakutsi  du osasun krisia izanik ere emanaldi hau egin ahal izateagatik.

Zuzendariaren oharrak

“Globalizazioa da Udal Musika Bandak eta Ensemble Rayuelak kontzertu honetan irudikatu nahi duten helburua. A priori, gaur egungo kontzeptu bat da erabat. Hala ere, globalizazioa elkarren menpekotasuna duten lurraldeen eta herrialdeen arteko komunikazio gisa ulertzen badugu, merkataritza-, gizarte-, kultura- zein politika-mailan, ikusiko dugu ez dela inolaz ere errealitate moderno bat. Aldiz, gizateriaren historian beti bilatu izan den helburu bat dela esatera ausartuko nintzateke.

Kontzertu honetan Julie Giroux konpositore estatubatuarraren musika entzun ahalko dugu. Bere melodien bidez, historiako pertsonarik ospetsuenetako bati jartzen dio soinua, Gengis Khani hain zuzen ere. Gudari eta konkistatzaile mongoliar honek gizateriak inoiz ezagutu duen bigarren inperiorik zabalena eraiki zuen XIII. mendeko lehen bi hamarkadetan: Mongolen Inperioa.

Mende horretan bertan, 1238an hain zuzen, Muhammad ibn Nasrek Nazari Erresuma edo Granadako Emirerria sortu zuen, zeina Iberiar penintsulako azken estatu musulmana izango baitzen: garai bateko Al-Andalus. Agintaritza horren emaitza Granadako Alhambra izan zen. Gaur, hura “bisitatzeko” aukera izango dugu Raquel Sánchez konpositore valentziarraren musikaren bitartez.

Esan bezala, Mongolen Inperioa bigarren inperiorik hedatuena izan zen, eta Britainiar Inperioak soilik gainditu zuen. Eta hemen kokatzen da kontzertuko beste obretako bat: “Around the World in 80 Days”, Otto M. Schwarz konpositore austriarrarena, eta, jakina, Jules Verne idazle frantsesaren istorio ezagunean oinarritua.

Azkenik, Oscar Musso konpositore andaluziarraren lanak egun bizi dugun fenomenora eramango gaitu, azken hamarkadetan gertatu den garrantzitsuena: COVID-19aren pandemia.

Honekin guztiarekin argi geratzen da globalizazioa gizakiak berezkoa duen gauza bat dela, eta, gainera, historian aurrera egin ahala gero eta azkarrago gertatzen dela. Erdi Aroan hamarkadak behar zituzten inperio hauek sortzeko, eta urteak haietan barrena ibiltzeko; XIX. mendean azalera handi horiek aste batzuetan zeharkatu zitezkeela erakusten digu Phileas Foggek. COVID-19arekin ikusi dugu Txinan sortutako birus batek egun batzuk baino ez dituela behar mundu osoan zehar zabaltzeko, edo ordu gutxi batzuk.

Luis Orduña

 

Share

Gasteizko Udal Bandak “Bizitza kolorean” aurkeztuko du

Martxoaren 10ean (asteazkena) izango da Gasteizko Udal Musika Bandaren abonamenduko 5. kontzertua, Principal Antzokian

Gasteizko Principal Antzokian izango da Udal Musika Bandaren abonamenduko 5. kontzertua, martxoaren 10ean (asteazkena), arratsaldeko zazpietan; “Bizitza kolorean” du izenburu. Gasteizko Bandaren zuzendari Luis Orduñak zuzenduko du emanaldia, eta Víctor de Andrés izango da tronboi-jole bakarlaria.

Aukeratutako errepertorioan pieza hauek daude: “Dalí”, Aldo Rafael Forterena; “Fantasy of the Elements”, Silvia San Miguelena, eta “Colors”, Bert Appermont-ena. Lehenengo aldiz joko du Bandak hiruretako bakoitza.

Silvia San Miguelek bere lanari buruz hitz egin du gaur goizeko prentsaurrekoan. “‘Elementuen fantasia’ deitzen diot, asko gustatzen zaidalako Young. Konposatu nuenean, pertsonalitateei buruz egiten zuen analisiari buruz irakurtzen ari nintzen, eta pertsonalitate horiek lau elementuekin lotzen zituen, eterraz gain, zein ez baitut obran sartu”.

“Jarraitu Bandari” ekimenari esker, kontzertua streaming bidez ikusi ahal izango da udalaren webgunean.

Zuzendariaren oharrak

“Olinpon Zeus oroimenaren jainkosa Menmosinerekin maitemindu zen, eta pasioz betetako bederatzi gauetan giza inspirazioaren iturri diren bederatzi musak sortu zituzten, mitologia greziarraren arabera. Jainkosa haiek lurrera jaisten ziren haiei dei egiten zienei ideiak xuxurlatzera eta inspirazioa ematera.”

“Baina inspirazio-iturriak beste esparru lurtarragoetatik etor daitezke, noski. Arkitektoek, margolariek, eskultoreek edo idazleek naturako elementuetan, kolorean, batik bat, aurkitu dute hain “irrikatutako inspirazioa”. Musika-konpositoreek, jakina, gauza bera egin dute, eta horren hiru adibide entzun ahalko dituzue programa honetan.”

“Gasteizko konpositore Silvia San Miguelek naturaren oinarrizko lau elementuetan aurkitu du sorkuntza-bultzada, airea-lurra-ura-sua elementuetan, alegia, eta suiteko mugimendu bana dedikatu die. Aldo Rafael Forte kubatarrak, berriz, gauza bera egingo du Salvador Dalí artistaren obra koloretsu, komiko eta surrealistekin. Azkenik, obra ikusgarri bat aurkeztuko dugu, Bert Appermont belgikarrarena, tronboi eta bandarakoa; horretan, kolore bakoitzak mugimendu bat inspiratu du.”

“Zein garrantzitsua den kolorea gure bizitzetan! Eta zein beharrezkoa musika! Eta nolako bategite txundigarria ateratzen den kontzertua zentzumen guztiekin goza dezagun elkar hartzen dutenean musikak eta koloreek!”

Luis Orduña

Streaming bidez ikusi 

 

 

Share

(estekaz eguneratua) Marcel Ortegak zuzenduko du Gasteizko Udal Banda datorren asteazkenean Principal Antzokian

Bandaren abonamenduko laugarren kontzertua, ‘Horizonte XXII’, streaming bidez emango da, eta lehenengo aldiz rap-kantari batekin arituko da, Kloyrekin

 

Gasteizko Udal Musika Bandak Marcel Ortega izango du zuzendari gonbidatua abonamenduko bere laugarren kontzertuan, “Horizonte XXII”, datorren asteazkenean, otsailak 10, Principal Antzokian. Bandaren historian lehenengoz, rap-kantari batek ere hartuko du parte, Kloyk.

Bandak kalitateko errepertorioa eskainiko du, lehenengo aldiz jotzen duen piezaz osatua: “Asimov’s aviary”, Joel Puckett-ena (5’); “Febris ver”, Nancy Galbraith-ena; “Ikiru Yorokobi”, Roger Boutry-rena eta 6. Sinfonía 6, “Grafítica”, Andrés Valero Castells-ena.

“Jarraitu Bandari” ekimenari esker, kontzertua streaming bidez ikusi ahal izango da udalaren webgunean.

Zuzendariaren oharrak

Musikak mugiarazten gaitu, baina eragin ere egiten digu: historian zehar, sortzaile guztiek beren une historikoetako erronkak eta krisiak bizi izan dituzte artistikoki. Hala, Andrés Valerok Espainiako sorkuntzako azken hogei urteetako obrarik interesgarrienetakoa sortu du, dakarren mezuagatik zein hura adierazteko eragatik. Izan ere, azken batean, geure buruari hainbestetan egiten diogun galderan laburbiltzen dira geure mendeak planteatzen dizkigun erronkak: Nolako mundua utzi nahi diegu geure seme-alabei?

Nolako mundua hartuko dut oinordetzan XXII. mendeak XXI.a modelatu dugunon eskutik? Valero Castellsen “Sinfonia Grafítica”rekin batera, 80ko hamarkadan Roger Bountyk jada sumatzen zuen eta bizitzearen harribitxiaren aldarri batean bideratu zuen kulturartekotasuna; bibrazioz Nancy Galbraithek mamitzen duen naturarekiko eta haren betiereko birjaiotzearekiko mirespena; Asimoven irudimen mugagabea, zeina zientziaren ahalmenen aurretik baitzihoan eta Joel Puckettek soinutan imajinatu baitzuen. Laurek interpelatzen gaituzte, eta gu zein gure inguruko errealitatea seinalatzen gaituzte. Onartuko al dugu haien erronka?

Marcel Ortega

 

 

 

 

Share

Udal Bandak “Pangea, gure planetaren musika paisaia” kontzertua emango du datorren igandean, Principal Antzokian

Emanaldia 18:00etan hasiko da, eta familiei zuzenduta dago

Gasteizko Udal Musika Bandak “Pangea, gure planetaren musika paisaia” kontzertua emango du datorren igandean (otsailak 7), Principal Antzokian, Luis Orduñaren zuzendaritzapean. Emanaldia 18:00etan hasiko da, eta 6 urtetik gorako familiako kide guztiei zuzenduta dago.

Kontzertuan Abraham Cupeirok, zeina munduko musika tresnen bakarlari eta “Pangea” proiektuaren sustatzailea baita, eta Josune Vélez de Mendizábal aktore-narratzaileak hartuko dute parte.

“Orain dela 200 milioi urte, kontinente bakar eta erraldoi bat zegoen gure planetan: Pangea. Hura pitzatzen hasi, eta, denboraren poderioz, gaur egun ezagutzen ditugun kontinenteak sortu ziren. Kontzertuan, Lurraren parteak lotuko ditugu proposatzen dugun musika-bidaian. Pangea gure planetaren kultura-aniztasunaren aldarria da”, azaldu du Luis Orduñak, Udal Musika Bandaren zuzendariak.

Emanaldia “Familientzako musika” abonamendukoa da, eta ordu bat eta 15 minutu iraungo du.

Abraham Cupeiroren oharrak

“1910ean, Alfred Wegener meteorologo alemana, atlasa begiratzean, ohartu zen kontinenteen siluetak elkarrekin ahokatzen zirela, eta harrezkeroztik datuak biltzen hasi zen; datuak gero “Kontinenteen eta ozeanoen jatorria” bere liburuan argitaratu zituen. Berak zioenez, orain dela 300 milioi urte, mundua kontinente bakar batek osatzen zuen, Pangeak, zeinak grekoz “Lur osoa” esan nahi baitu.”

“Biologiaren ikuspegitik, teoria horrek azaltzen du ozeanoek bereizita dauden kontinenteetako espezieen arteko ahaidetasuna. Geologiaren ikuspegitik, azaltzen du zergatik dauden antzeko formatu geologikoak kontinente ezberdinetan. Lehorrean bizi gara gizakiok, baina ozeanoek ezartzen dute, agian, zer klima dagoen eta, zenbaitetan, zer orografia dagoen, eta nolako izaera duten toki bateko biztanleek.”

“Obra honekin, Lurra batu nahi dugu musikaren bidez, modu metaforikoan, funtsezkoa baita denok bat egitea geure planetaren suntsipena geldiarazteko. Bat egite hori ezinezkoa izango litzateke, hirugarren elementu batengatik izango ez balitz: airea. Izan ere, airerik gabe, musika-tresnen soinuak ezin izango luke espazioa zeharkatu eta gure belarrietara iritsi. Musika tresna horiei, apalago diren beste batzuk gehitzen zaizkie, zeinek iradokitzen baitituzte eraman nahi zaituztegun kulturak eta paisaiak.”

“Entzun dadila musika Lurraren hondo-hondotik, ozeanoen hondo-hondotik!”

Abraham Cupeiro

Share

‘Déjà vu’ ikuskizunarekin inauguratuko da, igandean, Eguberrietako denboraldia, Principal antzokian

Salgai daude, dagoeneko, familientzako ikuskizun horretarako sarrerak, ohiko lekuetan

 

Datorren igandean, azaroak 29, inauguratuko dute Gasteizko antzokiek Eguberrietako denboraldia, Manolo Alcántararen konpainiaren ‘Déjà vu’ ikuskizunarekin —bigarren ikuskizuna dute, ‘Rudo’ren ondoren—.

Berriro ere, protagonismo berezia bereganatzen du eszenografiak. Etengabe eraikitzen ari zen espazio bat bazen orduan, oraingo honetan, berriz, protagonistak —Kafkaren ipuin bateko gizon arrunta, errutinak gogaitua— ezinezko abenturak amesten dituen markoa izango da. Gurearen antzeko unibertso oniriko bat, non objektuek ezinezko neurriak hartzen dituzten, izan behar luketen baino handiagoak edo txikiagoak diren.

Oso ikuskizun bisuala da; lausotu egiten dira errealitatearen eta fantasiaren arteko mugak. Ahotsak eta biolinak sortutako soinu-unibertsoak —errepikakorra, bizia, alaia— pertsonaiaren dualtasuna nabarmentzen du. Unibertso oniriko batera eramango gaitu. Ikuskizun bereziki iradokitzailea, ausarta eta liluragarria da… umore finez josia.

“Antzerki fisikoarekin mugakide den eta beste diziplina batzuetan, hala hola txotxongiloetan eta proiekzioetan, oinarritzen den zirku pertsonal honek lilura ditzan uztera animatzen ditugu familiak. Jakin-mina, intuizioa eta gauzak modu berezian azaltzeko gogoa dira eragile bertan”, adierazi du Gasteizko Hezkuntza eta Kultura zinegotzi Estibaliz Cantok.

Manolo Alcantarak sortua da antzezlana, eta berak zuzenduko du, baita agertokira igo ere, Laia Rius, Andreu Sans eta Silvia Compterekin batera.

18:00etan izango da emanaldia, Principal antzokian, behar diren segurtasun-neurriekin. 6 urtetik gorako ikusle ororentzat. Sarrerak dagoeneko salgai daude, leihatilan, telefonoz edo Udalaren webgunean. 9 euro balio dute.

Beste hitzordu batzuk

Era berean, salgai daude sarrerak Korrontzi & Xabier Amurizaren emanaldirako —abenduaren 30ean izango da, Principal antzokian—. Izaroren kontzertuko sarrerak, berriz, agortuta daude dagoeneko.

Udalaren Antzoki Sarearen Eguberrietako programazioko gainerako ikuskizunetarako sarrerak abenduaren 1ean jarriko dira salgai, 10:00etan, ohiko lekuetan.

Informazio gehiago

 

 

Share

Ruper Ordorikak irekiko du berriro Principal antzokia, uztailaren 17an

 

Uztailaren 1ean jarriko dira salgai Udalaren Antzoki Sarearen udako denboraldirako sarrerak

 Gasteizko Principal antzokiak uztailaren 17an irekiko ditu berriro ateak, Ruper Ordorikaren kontzertu batekin. Martxoaren 11tik egon da itxita aretoa, COVID-19a Arabako hiriburura iritsi zenetik. “Pandemia dela eta bertan behera utzitako lehen ikuskizuna izan zen, eta egokitzat jo dugu antzokia musikari handi horrekin irekitzea berriro, eta normaltasuna berreskuratzea“, iragarri du Hezkuntza eta Kultura zinegotzi Estíbaliz Cantok.

Gaur goizean egindako prentsaurrekoan aurkeztu du zinegotzi sozialistak Udalaren Antzoki Sarearen udako denboraldia. “Gaurkoa egun benetan berezia da, Udalaren Antzoki Sarearen udako denboraldia aurkeztuko dugulako, eta horrek esan nahi duelako hiriko antzokiak berriro irekiko ditugula eta kultura berpiztuko dela“, adierazi du Cantok.

“Lan handia egin dugu egitarau erakargarria prestatzeko eta antzokia espazio guztiz segurua izan dadin; berriro altxatuko dugu oihala, herritarrek gozatzerik eta hunkitzerik izan dezaten, eta normaltasunera itzul daitezen. Kulturaren eta gure kultur eragileen balioa nabarmendu nahi dugu, eta zerbitzu publiko gisa mantentzeko beharra ikusarazi, guztiz ezinbestekoa baita“, erantsi du.

Antzokia edukieraren ehuneko 50arekin (492 sarrera) irekiko da, ikusleen artean eserleku bat utzita eta maskara derrigorrez erabilita.

Programazioa

Zortzi ikuskizunek osatuko dute Udalaren Antzoki Sarearen udako programazioa, musika, dantza, antzerkia eta umorea barne. Horietako sei euskal konpainiek eskainiko dituzte.

Uztailaren 17an (ostirala) izango da lehena,  Ruper Ordorika eta haren Mugalariekin (Arkaitz Miner, Fernando Neira ‘Lutxo’ eta Hasier Oleaga); ondoren, uztailaren 26an (igandea), EGOk joko du. Euskalherriko Gazte Orkestrak C. Gounod, Mahler eta Schuberti eskainitako kontzertua emango du, Rubén Gimenoren zuzendaritzapean.

Hurrengo hitzordua uztailaren 30ean (osteguna) izango da, Yllana taldearen umorearekin. Beren azken lana, ‘Maestrissimo, Pagagnini II’, aurkeztuko dute, une honetako biolin-jotzaile izarrak lagunduta: Strad. Uztailaren 31n (ostirala) ere umoreak jarraituko du,  El mono habitado konpainia gasteiztarraren ‘Benditas’ lanarekin. Begoña Martín Treviño eta Carmen San Esteban dira protagonistak.

Abuztuaren 4an, omenaldi sinbolikoa egingo diogu Zeledoni, iragarri genuen bezala. Horretarako, oso saio berezia antolatu dugu, 2019ko Urrezko Zeledonen banaketa, aurten antzerkiarekin lotura handia duten bi pertsona sarituko baitituzte: Pilar López, Teatro Paraísoko kidea, eta Txema Blasco aktore handia”, aurreratu du Hezkuntza eta Kultura zinegotziak. “Udalaren Musika Bandak girotuko du ekitaldia, Luis Orduñaren zuzendaritzapean, errepertorio fresko eta dinamikoa eskainiz”, erantsi du.

Udako berritasun nagusia  ‘Simplicissimus’ euskarazko kabareta izango da, abuztuaren 6an (osteguna); Tartean konpainiaren lan horretan zuzenean abestu eta joko dute musikariek eta kantariek. Patxo Tellería, Olatz Gamboa eta Getari Etxegarai dira antzezleak, eta Jokin Oregi, zuzendaria.

Abuztuaren 8an itxiko dugu Principal antzokiko udako programazioa, publikoak oso maite duen komiko handi batekin, XXI. mendeko juglare handiarekin: Rafael Álvarez ‘El Brujo’. ‘‘La Luz Oscura’ lana ekarriko digu, San Juan de la Cruz mistiko karmeldarraren figuran inspiratutako umorezko bakarrizketa”, azaldu du Cantok.

Al traste danza konpainia gasteiztarrak itxiko du denboraldia: ‘Mientras llueva’ lana estreinatuko du, Zuriñe Benavente eta Ignacio Monterrubio protagonista direla. Irailaren 25ean (ostirala) izango da, Ibaiondoko gizarte etxeko Félix Petite antzokian.

Sarreren salmenta

Uztailaren 1ean (asteazkena) hasiko da salmenta, 10:00etan; ahal dela online erostea gomendatzen da. Dena den, aukera guztiak eskainiko dira, ordutegi honetan:

  • Uztailak 1, asteazkena. Leihatilan eta telefonoz: 10:00 – 13:00 eta 18:30 – 20:30. Interneteko salmenta: 10:00etatik aurrera.
  • Salmenta arrunta: uztailaren 2tik (osteguna), Principal antzokiko leihatilako ohiko ordutegian: asteartetik larunbatera (jai egunetan izan ezik), 18:30etik 20:30era, eta ikuskizuna hasi baino bi ordu lehenago.

“Ahalegin handia egin dugu zentzuzko prezioak jartzeko, ohi baino merkeagoak, ez baitugu nahi hori oztopo izatea herritarrek kultura eskuratzeko garaian. Online erostea sustatzeko, gainera, prezio horiek leihatilan edo telefonoz erosita baino merkeago jarri ditugu“, amaitu du Estíbaliz Cantok.

Udal antzoki sareko Udako Programa

 

Share